【电影】15029[6.20]《冲锋车》

呢啲先係充满港味，地道香港出品嘅纯正港产片！值得点赞啊！胶爆头嘅吴镇宇先係吴镇宇嘛，佢会抢劫，佢会杀人放火，会踎监，会枪战，但唔应该揸飞机去英国拍拖。好老实讲，用学院派观点去睇，呢部戏不折不扣应该被列入烂片行列，夸张嘅表演，唔专业嘅后期，粗糙嘅特效，还有充斥住嘅粗口。但拧转头一睇，呢个唔正係上个世纪港产片大行其道嘅时候佢哋都或多或少有嘅特点么？係彭浩翔同杜琪峰两位地方派大佬都北上搵钱，佢哋嘅电影中都出现普通话嘅时候，有一个从前专门编烂剧嘅人凭住全粤语嘅班底，拍出一部香港人自己嘅诚意作品，实在令呢个晚上充满惊喜。电影就係讲一个《那晚半夜，我坐上了旺角开往牛潭尾的红VAN》嘅故事。连最后生嘅谭耀文都已经45岁嘅中坑抢劫团将一部十六座小巴改成冲锋车，扮差佬抢劫，但呢次唔係讲PTU，亦唔係无间道，而係玩黑色幽默搞笑，所以心照不宣我哋都可以估倒跟住发生乜嘢。味道就在于呢班已过不惑嘅中年人佢哋都有作为一个小市民嘅羁绊，亲情、爱情、兄弟情，所谓盗亦有道，半世人嘅经历令佢哋都稍微对人情同世界有咗更深嘅领会，唔再係杀人唔眨眼嘅悍匪，亦就因为呢种羁绊令再恶嘅人亦有咗向善嘅心，终于最后假警察做咗一轮真差佬，真正“替天行道”咗一回。电影最大嘅亮点在于台词够地道，古巨基揸小巴嘅吐槽同爆粗，还有吴镇宇最后要去鸭脷洲将三叔公条龙舟改军舰抢返“我哋个岛”返嚟为国争光嘅彩蛋都劲搞笑，实在佩服香港人嘅思维，所谓烂编剧，怕且係因为佢编出嘅剧冇办法用正确嘅语言去表达啫。诚意之作，精彩，充满惊喜嘅港产片味道，推荐俾讲粤语嘅小伙伴，唔收藏。